ნანა კირთაძე
სსიპ ზუგდიდის მუნიციპალიტეტის სოფელ ჯიხაშკარის საჯარო სკოლის დაწყებითი კლასების მასწავლებელი
კონსტრუქტივისტული მიდგომების განხორციელებისთვის საუკეთესო საშუალებად აღიარებულია კომპლექსური დავალება, რომელიც ასევე ცნობილია პროექტული, ავთენტური კონტექსტის, კვლევაზე, პრობლემაზე დაფუძნებული დავალებების სახელწოდებითაც. არაერთხელ დასმულა კითხვა, რით გამოირჩევა კომპლექსური დავალება სხვა ტიპის დავალებებისგან?
წარმოგიდგენთ კომპლექსური დავალების ძირითად მახასიათებლებს:
♦ კომპლექსური დავალება უნდა შეიცავდეს გამოწვევას. გამოწვევა გულისხმობს, რომ დავალების პროდუქტი არ უნდა იყოს:
- მარტივად შესასრულებელი;
- შესასრულებლად შეუძლებელი.
თუ მოსწავლისთვის დავალება მარტივად შესასრულებელია, არსებობს საფრთხე, რომ ბავშვის დამოკიდებულება იყოს ზერელე და არასერიოზული, ხოლო ზედმეტად რთული დავალების შემთხვევაში – საერთოდ უარი თქვას მის შესრულებაზე.
♦ კომპლექსური დავალება უნდა აღძრავდეს ცნობისმოყვარეობას. ცნობისმოყვარეობის აღძვრაში ვგულისხმობთ, რომ მოსწავლეს უნდა ჰქონდეს პროდუქტის შექმნის მოტივაცია და მისი უკეთესობისკენ ცვლის სურვილი.
ამ შემთხვევაში, იდენტური პროდუქტის განმეორებისა და ხშირად შექმნისგან თავი უნდა შევიკავოთ. ვთქვათ, პროდუქტი „ანალიტიკური კომენტარი“ (ან ნებისმიერი სხვა) თუ ერთსა და იმავე თემას შეეხება, ის მოტივაციის ზრდას ნაკლებად შეუწყობს ხელს. ბუნებრივია, ამ შემთხვევაში, არ ვგულისხმობთ იმას, რომ ანალიტიკური კომენტარის შექმნისგან თავი უნდა შევიკავოთ.
♦ კომპლექსური დავალება ხელს უნდა უწყობდეს შემოქმედებითობასა და ფანტაზიის ამუშავებას. მოსწავლისთვის კომპლექსური დავალება შემოქმედებითი პროდუქტია, რომელსაც ორიგინალური იდეებითა და კომბინაციებით უნდა ქმნიდეს.
მოსწავლეებს აქვთ უამრავი იდეა, რომელთა განხორციელებისთვის კარგი შესაძლებლობაა კომპლექსური დავალება. თუ ჩვენ გვსურს, რომ ორგანულად მოხდეს ბავშვებისთვის ფუნქციური უნარების განვითარება (მათ შორის, ერთ-ერთია შემოქმედებითი უნარი), ამისთვის სასკოლო გარემოში კომპლექსურ დავალებას ალტერნატივა არ აქვს.
♦ კომპლექსური დავალება უნდა უკავშირდებოდეს ესთეტიკურ გამოცდილებას, რომელიც კავშირშია ემოციურ რეაქციებთან. ემოციური რეაქციების მართვით შექმნილი კომპლექსური დავალება ესთეტიკურ პროდუქტსაც წარმოადგენს.
ხშირია შემთხვევა, როცა ბავშვები თავიანთ ნაშრომებს დამატებით ეფექტებს ანიჭებენ ილუსტრაციებით, ფოტომასალების დამატებით და ა.შ. ბუნებრივია, ნებისმიერი ნაშრომისთვის, მატერიალურ თუ ციფრულ ფორმატში შექმნისას, ღირებულია ესთეტიკური მხარე, რაც დადებით ემოციებს აღძრავს. ამ ყველაფრის ფორმულირება ასე შეიძლება: „მოსაწონია“, „მეც გავითვალისწინებ, რადგან ყურადღების ქვეშ უფრო ექცევა ასეთი ნაშრომი“, „საინტერესოა“, „მიმზიდველია“ და ა.შ.
♦ კომპლექსური დავალება ახალისებს მეტაკოგნიტურ სტრატეგიებს. მეტაკოგნიცია იგივე სწავლის სწავლაა. რადგან მოსწავლეს ვერასდროს ვასწავლით იმდენს, რამდენიც საჭიროა მთელი ცხოვრების მანძილზე, ამიტომ უნდა გამოვიყენოთ მეტაკოგნიციის სტრატეგიები. ამით ჩვენ თავს ვიზღვევთ იმისგან, რომ პიროვნებამ, ცხოვრების არც ერთ ეტაპზე, არ შეწყვიტოს თვითგანვითარება.
აქვე დავძენ ერთ მნიშვნელოვან ასპექტსაც: საგნობრივი მიზნების გარდა, კომპლექსური დავალებით შესაძლებელია ეროვნული სასწავლო გეგმისა და ზოგადი განათლების ეროვნული მიზნების მიღწევა.